Nei har muzykstúdzje wie Clara Rullmann (1961) tweintich jier ferbûn as dosint oan 'e muzykskoalle op It Hearrenfean en runde se in privee pianopraktyk oan hûs. Dêrneist wurke se al dy jierren by it iepenloftteater yn Jorwert, dêr't se muzikaal foarm joech oan bekende musicals as My Fair Lady, Anatevka, Oliver, Zorba en Cabaret. Yn 2000 wie se bernemuzikaal lieder by Olivert, in musicalproduksje fan Joop van den Ende. Se wie muzikaal aktyf foar artysten as Willeke Alberti, Robert Long, Tom Parker, Rients Gratama en Gerrit Breteler. Se komponearre yn gearwurking mei Rients Gratama seis krystmusicals, opfierd yn it Posthuis Theater tusken 2011 en 2016. Foar Omrop Fryslân skreau se in soad edukatyf materiaal foar programma as Skik en WitWat en tekene dêrby sawol foar tekst as muzyk. Foar muzykútjouwerij de Haske ûntwikkele se in meardielige pianometoade, dy't sawol yn Nederlân as yn Dútslân en Frankryk útjûn is. Foar de edukative útjouwerij Eduforce ûntwikkele se in toaniellêsferhaal, dêr't se sawol skript en lietteksten as muzyk by skreau. ‘Abel, een verhaal over dromen en ontdekken’ is útjûn yn 2021. Yn 2023 skreau se skript, lietteksten en muzyk foar de muzykteaterfoarstelling 'Ocke', ta gelegenheid fan 'e weriepening fan 'e Martinitsjerke yn Snits. Foar de Afûk ûntwikkele se yn 2024 in Frysktalich boek foar pjutten en beukers mei lietsjes en ferhaaltsjes, dêr't se sawol tekst as muzyk by skreau. Dêrneist is Clara sûnt 2011 jierliks foar langere perioaden yn Yndonezië te finen, benammen op it East-Yndonezyske eilân Sumba, dêr't se aktyf is as ûntwikkelingswurker. Tusken 2011 en 2022 foar de stichting Save Our Sumba. Yn dy jierren sette se in gearwurking op poaten mei in lokale NGO (Donders Foundation). Om dat goed dwaan te kinnen, makke se har it Bahasa Indonesia eigen yn wurd en skrift. Se skreau Yndonezyske berneferskes en teach oer it eilân om dy mei de bern te sjongen. Noch altyd is se nau behelle by it wurk fan de Donders Foundation en fungearret se as tuskenpersoan tusken harren en bûtenlânske funders.