Putsjeploech siket minsken
Sûnt de oprjochting yn 1948 is De Folks op Skylge ûnskiedber ferbûn oan de ynset fan frijwilligers.
Sûnt de oprjochting yn 1948 is De Folks op Skylge ûnskiedber ferbûn oan de ynset fan frijwilligers.
De Putsjeploech bestiet út in hechte groep fan sa’n 20 oant 25 frijwilligers dy’t jierliks yn maart meidogge oan ’e “Putsjewike”: in wurkwike om oan te pakken, te bouwen, op te knappen én geselligens. Oft it no giet om it ûnderhâld of (fer)nijbou, dizze ploech draait de hân der net foar om. De groep bestiet út faklju en handige entûsjastelingen mei in hert foar de doelstellingen fan de Folks.
Liket it dy wat om in wike mei te wurkjen op Skylge?
Wy binne regelmjittich op ’e siik nei nije leden! In foarpetear mei ien fan de koördinatoaren heart derby - dêrnei sjogge jimme mei-inoar oft it in goede match is.
Wy hawwe benammen ferlet fan minsken mei ûnderfining yn timmerwurk, skilderwurk, elektra, sanitêr of oare technyske feardigens. Mar ek sûnder dy ûnderfining bisto wolkom - ast mar fan oanpakken witst. Jongere minsken dy’t der even út wolle, stelle wy wis op priis en ek koppels binne fan herte wolkom. Wat is der no moaier as in wike lang wurkje op in bysûnder plak midden yn ’e bosk, yn in noflike, belutsen groep?
Tink der om: de fiertaal yn de Putsjeploech is it Frysk. Affiniteit mei de Fryske taal en yn alle gefallen it goed ferstean kinne is dêrom belangryk.
Wat krigest der foar werom? Meidwaan oan de Putsjewike is fergees en alles is treflik fersoarge. Oerdei stekst de hannen út de mouwen, jûns is der romte foar ûntspanning: mei-inoar ite, in kuierke troch de bosk, yn ‘e dunen of oer it strân - en fansels neipraat mei in hapke en in drankje yn it Bopperom. In bysûndere ûnderfining is garandearre!
Mear ynformaasje? Nim dan kontakt op mei ien fan de koördinatoaren: Pieter Tamminga (Mitselwier), tel. 0519-241563 / 06-47442647 /pieterengeertje@gmail.com. Of Geart Bos (Skearnegoutum), tel. 0515-416753 / 06-45483378 / geart.bos@gmail.com
